बौद्धनाथ क्षेत्र विकास कप सेभेन ए साइड खुल्ला फुटबल प्रतियोगिताको उपाधि जोरपाटी फुटबल क्लबले हात पारेको छ ।
टुसाल युवा क्लबद्वारा आयोजित वडा नं ६ बौद्ध टाउन प्लानिङ फुटबल मैदानमा भएको फाइनल खेलमा जोरपाटी फुटबल क्लबले कीर्तिपुरको आर्टरिज क्लबलाई १–० गोल अन्तरले पराजित गर्दै उपाधि जितेको हो ।
जेठ ३१ गतेबाट असार २ सम्म भएको प्रतियोगितामा २८ वटा टिमको सहभागिता रहेको थियो । विजेता टिम जोरपाटी फुटबल क्लबले नगद ५० हजार ५ सय ५५ रुपैयाँ सहित ट्रफी मेडल र प्रमाणपत्र प्राप्त गरेको छ । उपविजेता कीर्तिपुरको आर्टरिज क्लबले नगद २५ हजार ५ सय ५५ सहित ट्रफी मेडल र प्रमाणपत्र प्राप्त गरेको छ ।
फाइनल खेलमा जोरपाटी फुटबल क्लबका जर्सी नं १४ का खेलाडी युवराज ढकालले गोल गर्दै सुरुवाती अग्रता दिलाएका थिए । खेललाई बराबरीमा ल्याउन कीर्तिपुरको आर्टरिज क्लबका खेलाडीहरूले धेरै प्रयास गरे पनि उक्त प्रयास गोलमा परिणत हुन सकेन।
प्रतियोगितामा उत्कृष्ट गोल रक्षक जोरपाटी फुटबल क्लबका अनिश माझी, उत्कृष्ट डिफेन्स आर्टरिज क्लबका सुवास तामाङ ,उत्कृष्ट स्ट्राइकर जोरपाटी फुटबल क्लबका बुद्ध लामा घोषित भए । उनीहरूले नगद ५ हजार रुपैयाँ सहित ट्रफी मेडल प्रमाण पत्र प्राप्त गरे ।
विजेता टिमलाई बौद्धनाथ क्षेत्र विकास समितिका अध्यक्ष राजकुमार लामा, कार्यकारी निर्देशक शान्ति लामा‚ टुसाल युवा क्लबका संरक्षक चन्द्रदिप लामा, तामाङ कल्याण गुठिका उपाध्यक्ष सोनाम लामा, ओम तामाङ सुखदुख गुठीका अध्यक्ष सुरज रुम्बा‚ टुसाल युवा क्लबका अध्यक्ष विजय लामा‚ समितिका सदस्यहरू जानुका भण्डारी श्रेष्ठ, रग्वा शेर्पा पशुपतिनाथ ९श्याम० खतिवडा लगायतले पुरस्कार वितरण गरेका थिए ।
कार्यक्रमलाई सम्बोधन गर्दै समितिका अध्यक्ष राजकुमार लामाले खेलकुदको विकास र खेलाडीलाई प्रोत्साहन गर्ने हेतु विगत १४ वर्ष पछि पुनः दोस्रो बौद्धनाथ क्षेत्र विकास कप आयोजना गरिएको बताए । उनले खेलकुदमा रुचि राख्ने युवाहरूलाई थप हौसला र प्रोत्साहन प्रदान गर्न र खेलको माध्यमबाट बौद्धनाथको प्रवर्द्धनमा समेत टेवा पुगोस् भन्ने हेतुले उक्त प्रतियोगितामा बौद्धनाथ क्षेत्र विकास समितिले सहयोग गरेको बताए।
उनले टुसाल युवा क्लबले प्रतियोगितामा उत्कृष्ट प्रदर्शन गर्ने खेलाडीहरूलाई टुसाल युवा क्लबमा समावेश गरी बि डिभिजन खेल्ने मौका प्रदान गर्न समेत अनुरोध गरेका थिए। टुसाल युवा क्लबलाई ए डिभिजनसम्म पुर्याउनको लागि आफ्नो व्यक्तिगत र समितिको तर्फबाट सक्दो सहयोग गर्ने प्रतिबद्धता व्यक्त गरे ।
उनले आफू पनि युवा भएको र युवा खेलाडी र खेलकुदलाई कसरी माथि उठाउने भन्नेमा चिन्तित रहेको बताउँदै उनले आगामी वर्षमा पनि समितिले यस्ता कार्यक्रमहरूलाई निरन्तरता दिने बताए।
असार १५ गते बौद्धनाथ क्षेत्र विकासले कराँते प्रतियोगिता समेत आयोजना गर्न लागेको जानकारी गराए ।
कार्यक्रमलाई सम्बोधन गर्दै क्लबका अध्यक्ष विजय लामाले प्रतियोगितालाई सफलता पूर्वक सम्पन्न गर्न सहयोग गर्ने सबैलाई धन्यवाद दिएका थिए। उनले क्लबले आगामी दिनमा पनि यस्ता प्रतियोगिताहरूलाई निरन्तरता दिने भन्दै उपस्थित सबैलाई धन्यवाद दिएका थिए ।
