सोलुखुम्बुको माप्य दुधकोशी गाउँपालिकामा आठ दिने मेलमिलाप आधारभुत तालिम सुरु भएको छ । न्यायिक निरुपणलाई सरल, सहज र विश्वासिलो बनाउन मेलमिलापकर्ताहरुको सहजताका लागि तालिमको आयोजना गरेको हो। न्यायिक समिति माप्य दुधकोशीको आयोजनामा चैत २२ गते देखि सुरु भएको तालिम २९ गते सम्म जारी रहने भएको छ ।
उदघाटन कार्यक्रममा बोल्दै गाउँपालिका अध्यक्ष बुद्धि किरण राईले मेलमिलाप सम्बन्धी तालिम निकै महत्वपुर्ण भएकाले सहभागीले तालिमबाट सिकेका ज्ञान आफ्नो गाउँ, टोल र छरछिमेकमा हुने सानातिना झैझगडा, विवाद समाधान र न्याय निरुपणमा विशेष भुमिका खेल्नु पर्ने बताउनुभयो ।
यस्तै पालिका उपाध्यक्ष एवंम न्यायिक समितिका संंयोजक गौरव राईले तालिमले मेलमिलापकर्ताहरुलाई न्यायिक सम्पादन गर्ने कार्यमा सहज होस भन्ने उद्देश्यले बिविध कानुनी सम्बन्धि अभिमुखिकरण कार्यक्रम सञ्चालन गरिएको उल्लेख गर्नुभयो । यस्तैगरी तालिममा सहभागीहरुले कानुनी ज्ञानको अभावले विभिन्न समस्या झैल्दै आइरहेको अवस्थामा तालिमबाट कानुनी व्यवस्था, न्याय निरुपण सम्बन्धी धेरै कुरा बुझ्ने मौका पाएको भन्दै खुशी व्यक्त गरेका छन् ।
